Тэма 18. Езус вучыць любіць бліжніх

Дыдактычная мэта:

пазнаёміць вучняў з біблійнымі прыпавесцямі пра добрага самараніна і пра смакоўніцу; дапамагчы вучням зразумець, што Езус Хрыстус заклікае нас любіць бліжніх, выконваць справы міласэрнасці для душы і цела бліжняга.

Выхаваўчая мэта:

фарміраваць у вучняў пачуццё павагі і любові да бліжніх.

Матэрыялы:

Біблія: Лк 10, 25–37; Лк 13, 6–9.

Ілюстрацыі:

1) «Прыпавесць пра міласэрнага самараніна», надпіс да ілюстрацыі: «„Як здаецца табе, хто з гэтых трох быў бліжнім таму, хто трапіў у рукі разбойнікаў?“ Ён сказаў: „Той, хто паступіў з ім міласэрна“. Тады Езус сказаў яму: „Ідзі і ты рабі таксама“ (Лк 10, 36–37);

2) «Прыпавесць пра смакоўніцу», надпіс да ілюстрацыі: «Але той сказаў яму ў адказ: „Пане, пакінь яе на гэты год. Я абкапаю яе і абкладу гноем. Можа, прынясе плод у будучым, а калі не, ссячэш яе“» (Лк 13, 8–9).

Фрагменты з фільма (мультфільма), прысвечаныя прыпавесцям пра міласэрнага самараніна і смакоўніцу.

Касцюмы для інсцэніроўкі.

Метады катэхезы:

малітва, аналіз біблійнага тэксту, медытацыя над абразом, завучванне ключавога верша на памяць, слуханне аўдыёзапісу Бібліі, прагляд фрагмента з фільма, дыялог, праца ў групах, творчая майстэрня — інсцэніроўка, маляванне.

Ход занятку

Малітва

Акт любові…

Чалавек пытаецца

У класе можна павесіць шнур для бялізны і падрыхтаваць прышчэпкі.

Катэхет піша на дошцы пытанне: «Хто мой бліжні?» (у сшытку заданне № 1).

Вучні вешаюць свае адказы на шнур. Катэхет падсумоўвае адказы вучняў.

Бог адказвае

Сёння мы з вамі даведаемся пра тое, як Езус адказаў на пытанне: «Хто з’яўляецца нашым бліжнім?»

Катэхет вешае на дошку ілюстрацыі:

1) «Прыпавесць пра міласэрнага самараніна», надпіс да ілюстрацыі: «„Як здаецца табе, хто з гэтых трох быў бліжнім таму, хто трапіў у рукі разбойнікаў?“ Ён сказаў: „Той, хто паступіў з ім міласэрна“. Тады Езус сказаў яму: „Ідзі і ты рабі таксама“ (Лк 10, 36–37);

2) «Прыпавесць пра смакоўніцу», надпіс да ілюстрацыі: «Але той сказаў яму ў адказ: „Пане, пакінь яе на гэты год. Я абкапаю яе і абкладу гноем. Можа, прынясе плод у будучым, а калі не, ссячэш яе“» (Лк 13, 8–9).

Катэхет прапануе вучням праслухаць аўдыёзапіс фрагментаў з Бібліі: Лк 10, 25–37; Лк 13, 6–9. Можна паказаць вучням фрагменты з фільма (мультфільма), прысвечаныя прыпавесцям пра міласэрнага самараніна і смакоўніцу (звярніце ўвагу на тое, каб фрагменты дакладна адлюстроўвалі біблійныя сюжэты).

Катэхет дзеліць вучняў на 2 групы і прапануе ім паставіць сцэнкі.

І група

Лк 10, 25–37

ІІ група:

Лк 13, 6-9

Вучні прадстаўляюць сцэнкі.

Катэхет задае вучням пытанні (у сшытку заданне № 2):

— Чаму святар і левіт прайшлі міма параненага і не дапамаглі яму?

— Чаму самаранін дапамог параненаму?

— Што самаранін зрабіў для чалавека, які трапіў у бяду?

— Чаму навучыў цябе міласэрны самаранін?

— З чым кожнага з нас параўноўвае Езус у прыпавесці пра смакоўніцу?

— Хто з’яўляецца вінаградарам, які клапоціцца пра дрэва нашага жыцця?

— Якія плады Бог хоча ўбачыць у нашым жыцці?

— Які момант са сцэнак для вас быў самым хвалюючым?

— Што вы зразумелі з гэтых сцэнак?

— Да якога з біблійных персанажаў вы найбольш падобныя?

— Якія словы і дзеянні з прыпавесці вам найбольш запомніліся?

— Чаму нас навучылі гэтыя прыпавесці?